پرۆفیسۆر د. کەمال مەزهەر ئەحمەد، كەسایەتیی ناسراو و گەورەئەكادیمی و مێژوونووسی كورد، مرۆڤێكی هەڵكەوتوو بووە و جێدەستى لە بوارى مێژووى گەلەكەماندا بەرز دیارە و لە بوارى مێژوودا ئینسكلۆپیدیا بووە و لە نووسیندا پێنووسێكى بەبڕشت و بەتوانا بووە.

د. كەمال مەزهەر، لە خێزانێكی ناسراوی شاری سلێمانییە و هەر لە كۆنەوە دانیشتووی شاری سلێمانی بوون، بەڵام بەهۆی پیشەی باوكییەوە، كە ''قۆمیسەر'' بووە، گواستراونەتەوە بۆ ''ئاغجەلەر'' و لە ڕێكەوتى 14ی 2ی 1937 هەر لەوێ لەدایك بووە.

کەمال مەزهەر لێوانلێوە لە زانستی مێژووی سەدەکانی ناوەڕاست و هاوچەرخ، پسپۆڕ و شارەزایەكی گەورەی ئەو بوارەیە و پتر لە نیوسەدە لە بواری زانست و زانیاریی مێژووی نەتەوەكەیدا بێوچان تێكۆشاوە و بەرهەمگەلێكى گرنگى مێژوویی بۆ كورد تۆمار كردووە و بێوچان خزمەتی بە ڕۆڵەی كورد كردووە.

ئەم مێژوونووسە بەوە ناسراوە كە بە ویژدانەوە و بە ڕاستی و دروستی ڕەوش و ڕووداوەكانی مێژووی تۆمار كردووە، دڵسۆز و پەرۆشى مێژووى نەتەوەكەى بووە و زۆربەی ژیانی تەرخان كردبوو بۆ نووسینەوەی مێژوو، بەتایبەتی لایەنە سیاسییەكەی. لەم ساڵانەی دواییدا، شەو و ڕۆژی خستبووە سەر یەك و لەپێناو دۆزینەوەی مێژوویەكی ڕاستەقینەی نەتەوەكەی، لەنێو بەڵگەنامە جیهانییەكاندا، ئازایانە كاری كردووە و زۆر بەرهەمى دانسقە و گرنگی لە فەوتان ڕزگار كردووە.

بەو ناساغى و بارى تەندروستییە خراپەشییەوە، هەر بەردەوام بوو تا بەرهەمگەلێكى مێژوویی بەنرخى لە دووتوێى كتێبدا بۆ نەتەوەكەى تۆمار كرد و وەك سەرچاوەیەكى باش خستییە بەر دەستی خوێنەران، بەڕاستی ئەمە خزمەتێكی گەورەی كەموێنە بوو بە نەتەوەكەمان.

دوای تەواوكردنی سەرجەم قۆناغەكانی خوێندنی بە سەركەوتوویی، کەمال مەزهەر لە ساڵی 1960 بۆ خوێندن چووەتە یەكێتیی سۆڤیەت و ساڵی 1963 دكتۆرای یەكەمی لەژێر سەرپەرشتیی ''د. ڕەحیمی قازی''دا وەرگرتووە، لە ساڵی 1969 دكتۆرای دووەمی، كە بە دكتۆراى ناوك (زانستى) ناو دەبرێت، لە مۆسكۆ وەرگرتووە.

لە ساڵی 1970 تا 2008 مامۆستا بووە لە بەشى مێژووى كۆلیژی ئەدەبیاتی زانكۆی بەغدا، لە حەفتاكانی سەدەی ڕابردوو سكرتێر و ئەندامی كارای كۆڕی زانیاریی كورد بووە لە بەغدا، ئەندامی ئەكادیمیای زانستیی كوردستان بووە، دەیان توێژینەوە و كتێبی بەنرخى لەبارەی مێژووی كورد و كوردستان بە زمانەكانى كوردى و عەرەبى و ڕووسى و ئینگلیزى هەیە، گەلێ لە بەرهەمەكانى كراون بە توركى و فارسى و ئینگلیزى و فەرەنسى و... هتد.

پاشان چەندین پرۆژەی دیكەى ئامادە كردووە، بۆ نموونە: ''كورد و كودستان لە بەڵگەنامە نەهێنییەكانی حكوومەتی بەریتانیادا''. لە كۆڕی زانیاریدا ڕۆڵی بەرچاوی گێڕاوە و گەلێك بابەتی بەپێز و بەنرخی هەیە لە بواری مێژووی سەدەی ناوەڕاست و نوێدا، بەتەنگەوە بووە وەك خەمخۆر و دڵسۆزێك بۆ نەتەوەى كورد و مێژووەكەى، ماوەیەكیش خۆی تەرخان كردبوو بۆ كورد و میراتی كوردى دەبووژاندەوە.

بەتەنگ زۆر شتی برادەرەكانییەوە بووە، بەتایبەتی ''فوئاد عارف'' كە وەك ئەرشیڤێكى سیاسیی گەورەی كورد وا بووە. دكتۆر کەمال مەزهەر بۆ نووسینەوەی ئەو ئەرشیڤە و تۆماركردنى بۆ مێژوو، هاوکات ڕزگاركردنی لە فەوتان، هاوكارێكی باشی بووە و دڵسۆزانە كارى تێدا كردووە.

د. کەمال مەزهەر، چـەندین زمـانی بـیـانـیی بـە بـاشـی زانیوە، وێڕای ئەوەیش كـە مێژوونووسێكی گـەورەى ئەكـادیمی بووە، نووسەرێكی گەورە و دیار و بەرچاو بووە و لە نووسەرە پلە یەكەكانی كورد هەژمار دەكرێت. د. کەمال مەزهەر گەوهەرى مێژوو، ناخى مێژوو، پسپۆڕ و شارەزایەكى بێهاوتا بووە و وەك مەرجەع و سەرچاوەیەكى بایەخدارى مێژوو دەناسرێت.

جگە لەو بوارانەیش، گەلێك كتێبی گەورەی سیاسیی هەیە كە نووسەران و ڕۆشنبیران و قوتابییانی كورد و تەنانەت بیانییەكانیش وەك دیكۆمێنتێكی گەورە و سەرچاوەیەكی گرنگ و پڕبایەخ سوودی لێ وەردەگرن، خۆم زۆر سوودم لێى وەرگرت و وەك شاگردێكى کەمال مەزهەر و د. مستەفا زەڵمى و كاكە حەمەى مەلاكەریم و د. نەسرین فەخرى، زۆر پێیان ئاسوودە بووم و زۆر زانیاریى بەسوود و گرنگم لێیانەوە چنگ كەوت.

وەك هەموو كوردێكى دڵسۆز و پەرۆشى كوردایەتى، لە ساڵی (1974) د. كەمال پەیوەندیی كردووە بە شـۆڕشەوە و ڕۆڵێكی كارای لەنێو ڕیزەكانی شۆڕشى كوردستان گێڕاوە، بەتایبەتی لە بواری ڕاگەیاندندا كە خوالێخۆشبوو دارا تۆفیق، ئەمیندارى گشتى بووە و د. کەمالیش جێگرى بووە، لەو ساتەوەختەدا ڕۆڵێكى باشى بینیوە.

وەكوو خۆم، زۆر لەمێژە بەپەرۆش بووم لە نزیكەوە بیبینم و چەند پرسیارێكی لەسەر ژیانى تایبەتى خۆی و پاشان لەسەر مێژوو لێ بكەم. بۆ ئەم مەبەستە، ڕۆژێك لە شاری سلێمانی سەردانم كرد و دیدارێكی تایبەتی مێژووییمان لەسەر ژیانى ''بارزانیی نەمر'' ساز دا، لەگەڵ ئەو بەڕێزەى ساڵانێك مامۆستاى بووە (كەریم زەند) كە بە خۆشحاڵییەوە پێشوازیی لێ كردین.

 دوای ئەو دیدارەى لەگەڵیدا سازم كرد و بە چەند زنجیرەیەك لە ڕۆژنامەى (خەبات)ـى زمانحاڵى پارتی دیموکراتی کوردستاندا بڵاومان كردەوە، خوێنەرێكى باش و تایبەتى هەبوو، لە هەمان كاتیشدا پرسیارگەلێكی لەلاى خوێنەر و جەماوەرى د. کەمال دروست کرد، پێیان وابوو، كە پێویستە زیاتر و زیاتر بدوێ و شرۆڤەى بابەتە هەستیارەكان بكات و چەند نهێنییەك بدركێنێ، چ لەسەر مێژووى سەدەی ناوەڕاست و مێژووى هاوچەرخ، چ لەسەر بارودۆخى سیاسی و نێوخۆیى و بیانى و..، هەرنەبێ كەمێكیش باس لە ژیانى تایبەتى خۆى و هاوڕێیانى بكات. لەبەر ئەوەى ئەو وەك ئەرشیڤێكى گەورەى نەتەوەیى و پسپۆڕێكى مێژووى كوردە و سەرمایەیەكى گەورە و بەنرخە، پێویستە بە شێوەیەكى زانستییانە بیانخاتە ڕوو.

ئەو دیدارەى پێشوویش وەك دەروازەیەك وابوو بە ڕووى خوێنەر و خۆیشمدا، بۆ ورووژاندنى چەند بابەتێكى دیكەى گرنگ و خستنەڕووى چەند ڕاستییەك، هەربۆیە لەسەر داواى پسپۆڕان و شارەزایانى بوارى مێژوو و مامۆستایانى زانكۆ و نووسەران و خوێنەران، بڕیارم دا بەردەوام بم و ئەوەندەى پێم بكرێ لەگەڵ د. کەمال مەزهەر درێژە بەو دیدار و گفتوگۆیانە بدەم. هەر بۆیە هەمیشە عەوداڵ بووم و بەدوایدا دەگەڕام، تا چەندین دانیشتن و گفتوگۆى ترمان لە شارى هەولێر ساز دا، چەند بەشێكمان بڵاو كردەوە و دواتر لە دووتوێى كتێبێكدا بە ناوى (د. کەمال مەزهەر ئاوڕ لە مێژوو دەداتەوە) بە چاپ گەیاند، كە د. جەبار قادر پێشەكیى بۆ نووسیوە.

چەند دادەنیشتم هەر لەو دەریاى زانستە تێر نەدەبووم، هەرچەندە بارى تەندروستیشى باش نەبوو، بەڵام لەپێناو گەیاندنى پەیامەكەیدا و وەڵامەكانى خوێنەران سەبارەت بە مێژووى نەتەوەیەك بێدڵیی نەدەكردین. بەهۆی هۆگری و خۆشەویستیمەوە بۆى، لەو ساڵانەى دواییشدا بەردەوام سەردانم دەكرد، هەر لە هۆتێل شیراتۆن و ماڵى خۆیان و سەردان و بەسەركردنەوەمان پێكەوە بۆ چەند شوێن و ماڵێك.

چەندی دەچوومە حزوورى، هەمیشە هەستم بە دڵخۆشى و ئارامى و بەختەوەرى دەكرد و خۆم لە كەشێكى زانستى و پڕ زانیاریى مێژوویی، لە حزوورى گەورەپیاوێكى زانستپەروەر و كوردپەروەرێكى پەرۆشى ڕێی پاكى كوردایەتى دەبینییەوە و ئاوێتەى ڕۆحى مێژووى كوردەوارى دەبووینەوە. پیاوێكى هێمن و لەسەرخۆ و لەخۆبردوو، تا بڵێیت بەڕێز و بەنرخ و سەنگین، ئەوەندە ڕێزى دەگرتین لە ئاستیدا هەستمان بە شەرمەزارى دەكرد، زۆربەى جار نەیدەهێشت بڕۆم هەتا نان و نمەكیمان نەكردبا، چەند جار بەكۆمەڵ و هەندێ جار بۆ خوانى نیوەڕۆ هەرسێكمان بەندە و د. کەمال و دادە شەهلاى هاوسەرى بووین، پاشان بە ئوتومبێلەكەیان پێكەوە منیان دەگەیاند بەو شوێنەى بۆى دەچووم.

هەڵبەت لە باسى دكتۆردا ناكرێ و نابێ ڕۆڵى مەزنى ئەو شاژنەى هاوسەرى لەیاد بكرێ كە وەك كێوێكى مەزن پشت و پەنا و هاوكارى دكتۆر کەمال بوو، ئەویش دادە ''شەهلا حەیدەری''یە، كە بەڕاستى لە سەردەمى ژیانى ڕۆژانەیدا و لە كاروبارى نووسین و تۆمارى مێژوو و بەرهەمەكانیدا، لەم ساڵانەى بارى تەندروستیی د. کەمال خراپ بوو، مەزنترین و جوانترین و كەموێنەترین ڕۆڵى گێڕاوە، جگە لەوەى كە لەو سەروەرییانەى ''د. کەمال''دا، شەهلا خان پشكى شێری بەر دەكەوێت و مێژوو تۆمارى ئەو هەڵوێستە جوامێرانەیەى دەكات و بەرز دەینرخێنێت، مەگەر هەر خوداى مەزن بتوانێت پاداشتى بداتەوە.

بەداخەوە پرۆفیسۆر کەمال مەزهەر، بیرمەندى گەورە و مێژوونووسی بەناوبانگى كورد، لە ڕێکەوتی 16/3/2021 لە تەمەنى 84 ساڵیدا بەهۆی نەخۆشییەوە لە وڵاتى ئەڵمانیا كۆچى دوایی كرد، زۆر لە كەسایەتییە ناسراوەكانى ناوخۆ و بیانى و خەڵكى كوردستان و عێراق دڵگران بوون بۆ كۆچی دواییەكەی و بە زیانێكى گەورەیان هەژمار كرد، هاوكات گەواهیى زانایى و گەورەیى ئەم مێژوونووسەیان دەدا كە ڕاستى و دروستیى كار و بیرى گەش و هەڵوێستەكانى جوامێرانە بووە و خزمەتێكى مەزنى بە نەتەوە و نیشتمانەكەى كرد.

هەر یەك لە سەرۆك مەسعود بارزانى و كاك نێچیرڤان بارزانى و كاك مەسرور بارزانی پرسە و هاوخەمیى خۆیان ڕاگەیاند. پاشان تەرمى پیرۆزى گەڕێندرایەوە كوردستان و لە ڕێوڕەسمێكى شایستەدا لە پایتەختى كوردستان لەلایەن سەرۆكى هەرێمى كوردستانەوە پێشوازیی لێ كرا و دواتر بەرەو شارى سلێمانى بەڕێ كرا و لەسەر وەسیەتى خۆى لە گردى سەیوان، لە تەنیشت محەمەد ئەمین زەكى بەگ بە خاك سپێردرا.

لە پەیامى هاوخەمى و سەرەخۆشیی سەرۆك مەسعود بارزانى بۆ كۆچى دوایى د. کەمال مەزهەردا هاتووە: "بەداخێكى زۆرەوە، هەواڵى كۆچی دوایى زانا و مێژوونووسى گەلەكەمان د. کەمال مەزهەرمان پێ گەیشت. د. کەمال لە تەمەنى پڕبەرهەمى خۆیدا خزمەتێكى زۆرى نووسینەوەى مێژووى گەلەكەى كرد و كتێب و بەرهەمە زانستییەكانى گەنجینەیەكى گرنگ و بەهادارن و بوونە هۆی دەوڵەمەندتربوونى ڕەوتى توێژینەوە و زانست و كتێبخانەى كوردى. لەدەستدانى مرۆڤێكى زاناى وەك د. کەمال مەزهەر، بۆ گەلەكەمان خەسارەتێكى گەورەیە. سەرەخۆشیى خۆم ئاراستەى بنەماڵە و كەسوكار و هەموو هەڤاڵانى و ناوەندە زانستى و ڕووناكبیرییەکان و سەرجەم ڕۆشنبیرانى كوردستان دەكەم''.

هەر سەبارەت بە كۆچی دوایی د. کەمال،نێچیرڤان بارزانی، سەرۆكى هەرێمى كوردستان، ڕایگەیاند:

"زۆر بەداخەوە هەواڵى كۆچى دوایی زانا و مێژوونووسی گەورەى كورد، پرۆفیسۆر کەمال مەزهەرم پێ گەیشت، خوالێخۆشبوو هەموو ژیانى بۆ تۆماركردن و ڕاستكردنەوەى زانستییانەى مێژووى گەلەكەى تەرخان كرد و لەو ڕێگەیەوە خزمەتێكى مەزنى بە نەتەوە و نیشتمانەكەى كرد و گەنجینەیەكى بەنرخى بۆ بەجێ هێشتین. لەدەستدانى د. کەمال مەزهەر، خەسارەتێكى گەورەیە و بەو بۆنە خەمناكەوە هاوخەمیی خۆمان بۆ بنەماڵە و كەسوكارى دەردەبڕین''.

هەروەها مەسرور بارزانى، سەرۆكى حكوومەتى هەرێمى كوردستان، لە پەیامى هاوخەمیدا بۆ كۆچی دوایی د. کەمال ڕایگەیاند: "بە داخێكى زۆرەوە هەواڵى كۆچی دوایی نووسەر و مێژوونووسى نێودارى كورد، د. کەمال مەزهەرم بیست، كە لە ڕێى بەرهەمەكانییەوە خزمەتێكى زۆرى بوارى مێژووى كوردستان و كتێبخانەى كوردیى كردووە، پرسە و سەرەخۆشى لە بنەماڵە بەڕێزەكەی و ڕووناكبیرانى كوردستان دەكەم''.

شاعیرى ناسراو، مامۆستا شیركۆ بێكەس، لە یەكێك لە ژمارەكانى گۆڤارى (رۆڤار)دا كە تایبەت بوو بە د. کەمال هۆنراوەیەكی بڵاو کردووەتەوە کە لە 26ی 6ی 1999 بەم شێوەیە دەنووسێت:

کەمال مەزهەر

هەموو هەموو بەیانیانێ

كە هێشتا هەتاو نووستووە و

هێشتا دیجلە خەواڵووە و دارخورماكان

لەناو تەمدا باوێشك ئەدەن

ئەو هەڵئەسێ.. لەگەڵ نەوڕەسدا هەڵئەسێ و

لە ژوورى وشەى بێداردا

بەرامبەر ئاوێنەى عەشقێ ڕائەوەستێ

پەنجەرەیەك لەناو سەریا ئەكاتەوە و

بە ئەسپایى دەست ئەبات و

پرشنگى مێژوویەك ئەگرێ و

پێى ئەنووسێ!

هەموو هەموو بەیانیانێ

ئەو خەمێكى ڕووناكمانە و

لە باخى فرمێسك و شیعر و لەناو دەنگماندا ئەرسكێ

كزەبایە و هاژە هاژە و نمەى بارانە و ئەپرسێ

گومانێكە و لە سۆراخى یاقووتەكانى ڕاستیدا

لە سیلەى هەموو دێڕێكدا دائەگیرسێ

هەموو هەموو بەیانیانێ

ئەبێ بە باڵندەى مێژووى نێو زەمانێ

ئەبێ بە كارێزكەنى كتێب و بە درەختى جێژوانێ

لە هەر كوێ بێ

وەك مێزەرى "شەرەفخان" و

هەورى سەر پیرەمەگروون و سدارەكەى "ئەمین زەكى"

ئەیبینین و وەكوو "لاوك " ئەیبیسین و

ئەویش ئێستا لە تەنیایى ژوورەكەیدا

كوردستانى بە دەرزییەك داوە لەسەر دڵى خۆى و

كە چاو ئەنێ بە برینى كێوانەوە

هەڵەبجەین و كۆچڕەوین و

لە هەركوێ بین ئەمانبینێ!

هەموو هەموو بەیانیانێ

ئەم قەڵەمى كازیوەیە

بەڵگەنامەى ئازارێكمان ماچ ئەكات و

گوڵە مێخەكێ ژێر بەردە قارەمانێ

لە دیرۆكمان ئەكاتەوە و

بە ڕۆحیەوە ئەینووسێنێ

هەموو هەموو بەیانیانێ!

كورتەیەك لە ژیانى زانا و مێژوونووس، د. کەمال مەزهەر

- لە ڕۆژى 14ی شوباتی 1937 لە ئاغجەلەرى سەر بە پارێزگاى كەركووك لەدایك بووە، لە سلێمانی خوێندنی سەرەتایی و ناوەندی و دواناوەندیی تەواو كردووە.

- ساڵی 1959 بەكالۆریۆسی لە مێژوو بە پلەى شەرەف لە زانكۆی بەغدا وەرگرتووە.

- ساڵی 1960 چووەتە ڕووسیا و لە پەیمانگاى ڕۆژهەڵاتناسی سەر بە ئەكادیمیای زانستەكانی سۆڤیەت، پلەى دكتۆراى لە ساڵی 1963 وەرگرتووە و ساڵی 1969 دكتۆراى ناوک زانستەكان (D.S.C)ی لە هەمان پەیمانگا وەرگرتووە. یەكەم كورد و یەكەم عێراقی و هەروەها لە ڕۆژهەڵاتیش یەكەم كەس بووە ئەو بڕوانامەیە وەربگرێت.

- لە نێوان ئەیلوولی 1959 و ئازارى 1960دا مامۆستای قۆناغی دواناوەندی بووە و لە تەمووزی 1970یشەوە بووە بە مامۆستای بەشی مێژوو، لە كۆلێژی ئاداب لە زانكۆی بەغدا.

 - لەنێوان 1971 – 1975 ئەمیندارى گشتیی كۆڕی زانیاریى كورد بووە.

- زیاتر لە 200 لێكۆڵینەوە و وتارى لە ڕۆژنامە و گۆڤارەكاندا بڵاو كردووەتەوە، وەكوو:

* (كۆڕی زانیاریى كورد) و (رۆشنبیریی نوێ) و (بڵێسە) و (كاروان) و (رۆژی كوردستان) و (هاوكارى).

* (برایەتی-التاخی)، (تووتن)، (بەیان)، (ڕەنگین)، (افاق عربیة)، (الثقافة)، (العراق)، (الثقافة الجدیدة)، (دراسات فی التأریخ والاثار)، (ئاسیا و ئەفریقیای ئەمڕۆ) بڵاو كردووەتەوە.

- پێشەكیی بۆ دەیان كتێب نووسیوە و بە دەیان لێكۆڵینەوە و كتێبی زانستیدا چووەتەوە و هەڵیسەنگاندوون کە گرنگترینیان بریتین لە:

1. شەرەفخانی بەدلیسی.
2. بابان، سۆران، بۆتان.
3. عێراق لە سەردەمی عەبدولكەریم قاسمدا.
4. یاداشتەكانی فوئاد عارف.

- بەشداریى لە چەندین كۆنگرە و كۆبوونەوە و كۆڕی زانستیدا كردووە، کە گرنگترینیان بریتین لە:

* كۆنگرەى نێودەوڵەتی بۆ مێژوو لە بەغدا ئازارى 1973.

* كۆنگرەى ڕۆژهەڵاتناسیی نێودەوڵەتی لە پاریس، تەمووزی 1973 و لەوێ لێكۆڵینەوەیەكی پێشكەش كرد دەربارەى (گیروگرفتەكانی لێكۆڵینەوە لە مێژووی كورد و ئەركەكانی كۆڕی زانیاریى كورد).

* كۆڕی (كێشەى كۆیلە لە ئەفەریقا)، تونس، حوزەیرانی 1985، لەوێ لێكۆڵینەوەیەكی بەناونیشانی (سەرمایەدارى و بازرگانی كردن بە كۆیلە)ی خوێندەوە.

* كۆنگرەى (كورد و شار، شارەكان لە كوردستاندا و كورد لە شارەكاندا) سیڤەر، پاریس، ئەیلوولی 1996.

* كۆڕی (پەیوەندیی نێوان عەرەب و ئێران) لە دۆحە، ئەیلوولی 1995.

چەندین خەڵاتی ڕێزلێنانی پێ بەخشراوە لە بەرامبەر هەوڵەكانی لە بوارى زانستی مێژوودا.

 بەپێی دواهەواڵ، كە لە گۆڤارى (ڕەنگین)دا بڵاو كراوەتەوە، پلەى (عالم)ى وەرگرتووە. خاوەنی كتێبخانە و ئەرشیڤێكی دەوڵەمەند بووە و پێشتر لە بەغدا دەژیا، بەڵام لە ساڵى 2008وە گەڕایەوە بۆ هەرێمی كوردستان و لێرە دەژیا.

مێژوونووسی بەناوبانگی عێراقی، عەبدولڕەزاق ئەلحەسەنی، دەربارەى كتێبی (كوردستان لە ساڵەكانی شەڕی یەكەمی جیهاندا) دەڵێت: ''وەكوو مێژوونووسێك زۆر شاگەشكە بووم لە بەرامبەر ئەو هەموو زانیارى و ئەو هەموو سەلیقەى لەو كتێبەدا هەبوو، كە لە سەرچاوەكانی ترى عەرەبی و جیهانیدا هاوتاى نییە''.

-‌ سەرپەرشتیی زیاتر لە 40 نامەى دكتۆرا و ماجستێری كردووە، هەروەها وەكوو ئەندام لە گفتوگۆی 60 نامەی دیكەدا بەشدار بووە.

کەمال مەزهەر پێی وا بووە، ئەوەى كۆمەڵ بەرەوپێش دەبات، خێزانە ئۆرستۆكراتە زلەكان نین، بەڵكوو چینە كۆمەڵایەتییەكانی ناوەڕاست و خوارەوەن. لە گەڕان و لێكۆڵینەوەكانیدا ناخی مێژوو دەخوێنێتەوە نەك توێژاڵ.

وەك ئەندامى كاراى كۆڕى زانیاریى كورد، خزمەتێكى زۆرى كردووە و چەندین بەرهەمیشى وەكوو كتێب و وتار و نووسین و لێكۆڵینەوەى زانستى و ئەكادیمى لەسەر مێژووى كورد و جیهان بە چاپ گەیاندووە و بڵاوی كردوونەوەتەوە.

- بەهۆی نەخۆشییەوە، لە وڵاتى ئەڵمانیا، لە تەمەنى 84 ساڵیدا و لە 16ی 3ی 2021 كۆچى دوایی كرد و دوای هێنانەوەی تەرمیان بۆ كوردستان، لە گردى سەیوان لە سلێمانى بە خاك سپێردرا.

-----------------------------

* سوودم لە كتێبی ''د. کەمال مەزهەر ئاوڕ لە مێژوو دەداتەوە'' وەرگرتووە، لە نووسینی: زانیار سەردار قڕگەیی. د. جەبار قادر پێشەكیى بۆ نووسیوە، ساڵى 2013، لە چاپخانەى شڤان- شارى سلێمانی بە چاپ گەیەنراوە.