یەكێك لە شاعیرە میللی و ناسراوەكانی شاری سلێمانی (قادر محەمەد سەعید)ە، كە ناسراوە بە (قادر برسی). ئەو ناسناوە هەر خۆی بۆ خۆیی هەڵبژاردووە. كەسایەتییەكی ناسراوی شاری سلێمانییە و دۆستێكی ئەدیبە ناسراوەكانی ئەم شارە بووە، خاوەنی چەندین شیعری نیشتمانییە و یەكێكە لەوانەی بە دەروێشی رێی كوردایەتی و بارزانی دەناسرا و چەندین شیعری بۆیان هۆنیوەتەوە.

 لە ساڵانی پێش شۆڕشی 14ی تەمووزی 1958، تامەزرۆ و خولیای بینینی بارزانی بووە، دوای ئەو شۆڕشە و تا ساڵانی دواتریش، چەند جارێك سەردانی بارزانیی كردووە، تەنانەت بارزانی جارێكیان خۆی بەدوایدا ناردووە و بینیویەتی. زیاتر لە چوار شیعری بۆ بارزانی هەیە و جارێكیان بارزانی بە نووسراوێك وەڵامی داوەتەوە و لە بەرامبەر ئەو هەست و سۆزە كوردپەروەرییەدا سوپاسی كردووە 

قادر برسیی شاعیر، لە ساڵی 1934 لە گەڕەكە دێرینەكەی مەڵكەندی لە شاری سلێمانی لە خانەوادەیەكی هەژار لەدایك بووە، لە بنەڕەتدا ماڵی باوكی خەڵكی ڕەباتن. قادر برسی لە تەمەنی منداڵیدا نەخرابووە بەر خوێندن، چونكە باوكی بە كار و پیشەی بەرگدروویەتی بەخێوی دەكردن، ئەمیش بۆ فیربوونی پیشەكەی، بووەتە شاگردی باوكی، بەڵام دواتر لە تەمەنی گەورەییدا چووەتە بەر خوێندن و لە هەردوو قوتابخانەی سەرەتایی شەواندا، كە قوتابخانەی (گۆیژە، فەیسەڵییە) بوون كە لە شوێنی بازاڕی عەسریی ئێستا بوون، وەكوو سێ كوچكەیەك وابوون لە تەك نەخۆشخانەی ناوەڕاستی ئەوسا، كە دیواری هەرسێ لایان لە حەوشەی یەكتردا بوون.

لە ساڵی 1947 بۆ یەكەم جار لە دڵ و دەروون و ناخیدا هەستی بە بەهرەی هونەری شیعر و شانۆ كردووە، هەر لەو ساڵانەدا توانیویەتی چیرۆكێكی شانۆیی بەرهەم بێنێ و لەتەك كوڕانی گەڕەكدا نماییشی بكەن، كە خۆی ئەكتەر و نووسەر و دەرهێنەری بووە، وەكوو لە بەرگی دووەمی (كەشكۆڵەكەی ئاغا)ی عومەری كەریم ئاغا باس كراوە. هۆنراوەیەكیشی لە (مەنەلۆج)ێكی هونەرمەندی ناسراو (حاجی مەكی عەبدوڵا)دا بەكار هاتووە. هەروەها سەرۆكی تیپی وەرزشیی (برسی) بووە. لە ساڵی 1957دا ئەندامی كۆمەڵەی هونەرەجوانەكانی كورد بووە لە بواری گۆرانی و شانۆدا.

لەبارەی یەكەم بەرهەمی شیعرییەوە، لە سەرەتای پەنجاكانی سەدەی ڕابردوودا لە سلێمانی لەسەر لاپەڕەكانی ڕۆژنامەی (ژین) و لە هەولێریش لە گۆڤاری (هەتاو)دا چاپ و بڵاوی كردوونەتەوە،. هەتا كۆچی دواییشی، لە زۆربەی زۆری ڕۆژنامە و گۆڤارەكاندا هەر بەردەوام بووە لە نووسینی شیعر و بڵاوكردنەوەیاندا.

شاعیر دەڵێت: ”لە قوتابخانە پچڕپچڕ و ناو بەناو هەندێكم خوێند. هەر ئەوەیش بووە هۆكارێ، كە بتوانم لە ساڵی (1967)دا بەشداریی تاقیكردنەوەكانی دەرەكی (خارجی) بكەم لەسەر شاری سلێمانی، لە شارۆچكەی (قەڵادزێ) بڕوانامەی شەشی سەرەتاییم لە خولی یەكەمدا بەدەست هێناوە، ئەوە بوو پێی بووم بە فەرمانبەر لە سەرۆكایەتیی شارەوانیی سلێمانی و هەتا ساڵی 1996 بەردەوام بووم و پاشان خانەنشین بووم.“

شاعیر چەند جارێك لەسەر هەڵوێستی كوردایەتی دەستگیر كراوە. لە ساڵی 1956 نامیلكەیەكی شیعری بە ناونیشانی (پشیلە و بەنگكێش) بڵاو كراوەتەوە، نووسەر و چیرۆكنووسی كورد مامۆستا موحەڕەم محەممەد ئەمین پێشەكیی بۆ نووسیوە و هونەرمەندی گەورەی كورد جەمال بەختیار وێنەی بەرگەکەی کێشاوە. لە ساڵی 1950 و دواتر لە زۆر ڕۆژنامە و گۆڤاری وەك (هەتاو، بڕوا، نەورۆز، ژین، شەفەق، هاوكاری، ڕەنگین، گۆڤاری شارەوانی و نەورۆزنامە) شیعری بڵاو كردووەتەوە.

 بەر لە كۆچی دوایی، لە وەڵامی پرسیارێكمدا، كە ئاراستەی ئەم شاعیرەم كردبوو، لەوێدا لێم پرسی، شیعرێكت هەیە بۆ (بارزانی) و كراوە بە سروود و لە لایەن هونەرمەندانەوە گوتراوەتەوە، تەنانەت لە ئاهەنگێكدا، كە سەددام حوسێن ئاماد ەبووە، ئەو سروودە گوتراوە، ئەوە چۆن بوو؟

قادر برسیی شاعیر بەم شێوەیە وەڵامی دامەوە و گوتی: ”لە ڕاستیدا چەند شیعرێكم بۆ بارزانی نووسیوە، بەڵام ئەوەی ئێوە ئاماژەتان پێی كرد، ئەوە ساڵێك دوای گەڕانەوەی بارزانی بوو، واتە لە ساڵی 1959 بە بۆنەی گەڕانەوەی سەرۆك بارزانی لە یەكێتیی سۆڤیەتی جاران بوو، بە ناوی (سڵاو لە كورد) نووسیومە، ئەمە شیعرەكەیە:

سڵاو لە كورد لە كوردسـتان    لە پڵنگەكەی چیای بـارزان

ئەمڕۆ ڕۆژی ئــازادییـــە        سەربەخۆیە پـارتـییەكـەمان

ئەو پارتییە بوو لە مەهاباد    شای هێنابووە هــاوار و داد

تێكۆشانی گـەلـەكــەمـان       ئەو ڕۆژەمـــان دێنێـتە یــاد

یـادی كـوشــتنـی پێشەوا      لـە تـاریـكــی نیـوەشــەوا

ئـێـمـەی ڕاپـەڕان لـە خــەوا   تـاكـوو بمرین لە ڕێی ئەوا

بـــمـریـن لــە ڕێی ئـازادیـا     لە پـێـنـاوی سـەربـەستیا

بـاڵدارێكـی سـپی و جوانین     لەناو ئاسـمـانی ئاشــتیا

ڕابـردوومـان گـەلێ جـوانە   هەمووی هەوڵ و تێكۆشانە

ئێستاش ئەوەی مەبەستمانە   ڕزگـاربـوونـی كـوردسـتانە

كـوردسـتـانـی داگـیـركـراو     دابـەشكـراو بـێ جـێگە و ناو 

تاكەی بیخۆن وەك گەزۆی  خاو كاسە ئەڕژێت پڕبێ لە ئاو

ئەمرین بۆ كورد بۆ كوردستان  لەسـەر پەیڕەوەكەی ئەوان

بەبێ لادان بــەبـێ وەسـتـان    ڕاناوەسـتین لــە تێكـۆشـان

لـە تـێـكـۆشـانـی یـەكـێـتی      شــان بەشـانی گەلی گێتی

بـەردەوامـە نەتەوەی كـورد   لەو پـەیمانەی كە داویـەتی

ئەو پەیمانەی دای بەزەعیم   بە سەركۆمار عەبدولكەریم

سـەخـتتــر و بــاڵاتــرە          لەسەر لوتكەی چیای دەرسیم“