دووەمین دیداری ئەشكەوتی شانەدەر سازدەكرێت

سه‌ره‌تا مێژوو شوێنه‌وار كه‌له‌پوور كولتوور مه‌ڵتیمیدیا له‌باره‌ی ئێمه‌وه‌
x

دووەمین دیداری ئەشكەوتی شانەدەر سازدەكرێت

بڕیارە دووەمین دیداری شانەدەر لە ئەشكەوتی شانەدەر لە قەزای مێرگەسۆر ئەنجام بدرێت، كە نوێنەری حكوومەتی هەرێمی كوردستان لەگەڵ تیمی زانكۆی كامبێردجی بەریتانی، لە پرێسكۆنفڕانسێكی ڕۆژنامەوانیدا، بەشێوەیەكی زانستی، زانیاریی دروست سەبارەت بە دۆزینەوەی ئێسكەپەیكەری مرۆڤی نیاندەرتاڵ بۆ ئامادەبووان و دەزگەكانی ڕاگەیاندن بخەنە ڕوو.

 لەمبارەیەوە، سۆران ئەمیر، بەڕێوەبەری فەرمانگەی گەشتوگوزاری قەزای مێرگەسۆر، بە (باسكورد)ی ڕاگەیاند، بڕیارە بەم نزیكانە دووەمین دیداری ئەشكەوتی شانەدەر لە ئەشكەوتی شانەدەر لە قەزای مێرگەسۆر ساز بكرێت، كە لەلایەن ئیدارەی سەربەخۆی سۆران و بەڕێوەبەرایەتیی گشتیی شوێنەوار و كەلەپوور و بەڕێوەبەرایەتیی شوێنەواری سۆران و فەرمانگەی شوێنەواری مێرگەسۆر، ئامادەكایی كراوە، لە دیدارەكەدا نوێنەری حكوومەتی هەرێمی كوردستان لەگەڵ تیمی زانكۆی كامبێردجی بەریتانی، لە پرێسكۆنفڕانسێكی ڕۆژنامەوانی بۆ دەزگەكانی ڕاگەیاندن، بەشێوەیەكی زانستی، زانیاریی دروست سەبارەت بە دۆزینەوەی ئێسكەپەیكەری مرۆڤی نیاندەرتاڵ باسی لێوەبكرێت."

 بەڕێوەبەری فەرمانگەی گەشتوگوزاری قەزای مێرگەسۆر، گوتیشی: "بۆ گفتوگۆی زیاتر و ئامادەكاریی بۆ دیدارەكە، لە چەند ڕۆژی ڕابردوودا، بە بەشداریی سەرپەرشتیاری ئیدارەی سەربەخۆی سۆران و قایمقامی مێرگەسۆر و بەڕێوەبەری شوێنەواری سۆران و شوێنەواری مێرگەسۆر، سەردانی ساسان عەونی، وەزیری شارەوانی و گەشتوگوزارمان كرد، كە كەیفی مستەفا، بەڕێوەبەری گشتیی شوێنەوار و كەلەپووریش ئامادەی دیدارەكە بوو."

ئاماژەی بەوەش دا: "لە دانیشتن و دیدارەكەدا گفتوگۆ سەبارەت بە دۆزینەوەی ئێسكەپەیكەری مرۆڤی نیاندەرتاڵ لە ئەشكەوتی شانەدەر كرا، هەروەها ئامادەكارییەكانی بەڕێوەچوونی ڕێوڕەسمێكی تایبەت بە دۆزینەوەی ئەو ئێسكەپەیكەرەی ئەم دواییانە گفتوگۆی لەبارەوە كرا.“

 ئەشكەوتی شانەدەر لە سنووری قەزای مێرگەسۆر، بەدووریی 122كم دەكەوێتە باكووری شاری هەولێر، لە بەشی باشووری دامێنی چیای برادۆست هەڵكەوتووە، پێش هەزاران ساڵ مرۆڤی نیاندەرتاڵ لەو ئەشكەوتەدا ژیاوە، بۆیە بە لانكەی ژیانی مرۆڤ دادەنرێت.

 ئەشكەوتەكە شێوەیەكی سێگـۆشەیی هەیە، بەرزییەكەی 18مەترە و درێژییەكەیشی 40 مەتر و پانییەكەی 27 مەترە، لەناوەوە فراوان دەبێتەوە تا دەگاتە 60 مەتر، بۆ یەكەمجار لە ساڵی 1951-1961 لەلایەن رالف سولیكی هەڵكۆڵینی تێدا كراوە، لە ئەنجامی لێكۆڵینەوەكەدا چوار چینی شوێنەواری ژمارەیەك ئێسكەپەیكەری مرۆڤی نیاندەرتاڵ و كۆمەڵێك كەلوپەلی بەكارهێنانی لەبەرد دروستكراو دۆزرانەوە، كە دەگەڕانەوە بۆ سەردەمی بەردینی كۆن، دوایین ئێسكەپەیكەریش لە ساڵی 2018 دۆزرایەوە و دوای لێكۆڵینەوە زانیستییەكان دەركەوت، كە هی ئافرەتێكە مێژووەكەی دەگەڕێتەوە بۆ 75 هەزار لەمەوبەر.