سەرچیمەن یەکێکە لە گەڕەکە هەرە کۆنەکانی شاری سلێمانی و دەکەوێتە نێوان گەڕەکی سابوونکەران و گەڕەکی گاوران و دەرگەزێن، کە (قاوەخانەی سەرچیمەنیشی پێ دەگوترێت).

 ناوی چیمەن لەوەوە هاتووە، کە چیمەن و مێرگ و مێرگوزار و کانی و ئاوی تیا بووە، هەروەها ناوی قاوەخانەکەش ئاماژەیە بەو قاوەخانە کۆنە مێژووییەی، کاتی خۆی لە گەڕەکەکەدا هەبووە و خاوەنی قاوەخانەکە (حسە کەڕ)ی ناو بووە و یەکێک بووە لە کەسایەتییە کۆمەڵایەتییە ناسراوەکانی شاری سلێمانی. ئێوارە کە دەهات، پیاو و کەسایەتییەکانی گەڕەک لە قاوەخانەکە کۆدەبوونەوە، هەروەها لە بۆنەکانیش چالاکیی تایبەت و جۆراوجۆر دەكران، دیارترین چالاکییەکانیش هەقایەتخوانی بووە و لە شەوانی رەمەزان، مەلا ئیسماعیل کتێبی چیرۆکەکانی رۆستەم و مەم و زین و ئەمیر ئەرسەلانی دەخوێندەوە.

 کەسایەتییە ناودارەکانی گەڕەکی سەر چیمەن:

 - حاجی شێخ ئەحمەدی موتابچی.

 - حەمەئەمین ئاغا حاجی برایم ئاغا و حەمەسوور ئاغای برای.

 - حاجی شێخ نووری حەڵواچی.

 - حاجی کەریمی عەنبەرخان.

- حاجی مەحموودی باپیری شەهید ئەنوەری مەجید سوڵتان.

 - مەلا ئەحمەدی دیلان، باوکی خوالێخۆشبوو حەمەساڵح دیلان و قادر دیلان.

 - مەلا حامید حەمدوون، كە کەسایەتییەکی کۆمەڵایەتی و ئایینی بووە و لە رۆژانی جەژنی نەورۆزدا نەورۆزانەی بەسەر منداڵانی گەڕەکدا دابەش دەکرد. نەورۆزانە بریتی بوو لە ئاوێک دوعاى بەسەردا خوێندرابێت.

 - شێخ بابا عەلى قەرەداخی، باوکی شێخ نوورى و باپیری بەهادین نووری، کەسایەتیی سیاسیی ناسراوی کوردستان و عێراق.

- مەحمود تۆفیق گورجی، ناسراو بە مەحموود تۆفیق شلک و حاجی عەلی فەوتاوی برای، کە ئەویش تێکۆشەرێکی دێرین و کەسایەتییەکی ناسراو بوو لەو گەڕەکەدا.

 - هەروەها هەندێک ماڵ و بنەماڵەی خاوەن پیشەی تایبەت هەبوون، وەک موتابچێتی و دروستکەری سابوون.