بەڕێوەبەری ناحیەی سکتان لە سنووری قەزای کۆیە ئاشکرای کرد، تیمێکی شوێنەواریی کۆماری چیک، سەرقاڵی ئەنجامدانی ڕووپێوی ناوچە شوێنەوراییەکانی سنووری ناحیەکەیانن.

 شاخەوان سکتانی، بەڕێوەبەری ناحیەی سکتان، بە (باسکورد)ی ڕاگەیاند: "تیمێكی شوێنەواریی کۆماری چیک، لە سنووری گوندی کۆدەرە دەستیان کردووە بە ڕووپێوکردن، کە لە چوارچێوەی (ڕووپێوی شوێنەواریی سکتان- گۆمەسپان)ە و یەکێکە لە پڕۆژە گرنگەکان".

 گوتیشی: "کاری ئەو تیمە بەپێی گرێبەستێکی فەرمییە لەگەڵ بەڕێوەبەرایەتیی گشتیی شوێنەوار، کە ماوەکەی پێنج ساڵە".

 باسی لەوەش کرد: "بە شێوەیەکی گشتی، کاری تیمە شوێنەوارییەکە ئێستا لە وەرزی سێیەمدایە، کە ئەنجام دەدرێت و تێیدا ناوچەیەکی فراوان بەسەر کراوەتەوە و ژمارەیەکی زۆر پێگەی شوێنەواری تۆمار کراون، کە دوای ڕووپێوکردنیان، بۆ کاری کنە و پشکنین ئامادە دەکرێن".