قەڵایەكی مێژوویی میرنشینی سۆران نۆژەن دەكرێتەوە

سه‌ره‌تا مێژوو شوێنه‌وار كه‌له‌پوور كولتوور مه‌ڵتیمیدیا له‌باره‌ی ئێمه‌وه‌
x

قەڵایەكی مێژوویی میرنشینی سۆران نۆژەن دەكرێتەوە

 لەسەر ڕاسپاردەی مەسرور بارزانی، سەرۆكی حكوومەتی هەرێمی كوردستان و بە سەرپەرشتیی نووسینگەی سەرۆك وەزیران، لەلایەن بەڕێوەبەرایەتیی گشتیی شوێنەوار و كەلەپووری هەولێر، دەست كراوە بە نۆژەنكردنەوەی قەڵای دوین، لە سنووری قەزای پیرمام.

 لای خۆیەوە، حامد كاكەیی، قایمقامی قەزای پیرمام لە سنووری پارێزگای هەولێر، بە (باسكورد)ی ڕاگەیاند: "لە درێژەی كار و پڕۆژە خزمەتگوزارییەكان لە سێکتەرە جیاوازەکاندا، لەسەر ڕاسپاردەی ڕێزدار مەسرور بارزانی، سەرۆكی حكوومەتی هەرێمی كوردستان، بڕیار درا، كە شوێنەواری قەڵای دوین نۆژەن بكرێتەوە، كە یەكێكە لە قەڵاكانی سەردەمی میرنشینی سۆران، دەكەوێتە زنجیرە شاخەكانی سنووری قەزای پیرمام لە باكووری شاری هەولێر".

 گوتیشی: "نۆژەنكردنەوەی ئەم قەڵایە بە چاودێریی حكوومەت و لەلایەن بەڕێوەبەرایەتیی گشتیی شوێنەوار و كەلەپووری هەولێر ئەنجام دەدرێت، ئێمەش لای خۆمان زیاتر هەماهەنگی و ئاسانكارییان بۆ دەكەین لە بەڕێوەچوونی كارەكانیان، هەروەك بە پڕۆژەیەكی گرنگی مێژوویی دەزانین، چونكە شوێنەوار ناسنامەی گەلانە و ئەركە هەموان پارێزگارییان لێ بكەین بۆ مانەوەیان".

لە سەردەمی فەرمانڕەوایی میرنشینی سۆران، كە سنووری میرنشینەكە ڕووبەرێكی بەرفرەوانی لەخۆ گرتبوو، بەمەش بایەخی زۆر بە دروستكردنی قەڵا و قوللە دراوە بۆ پارێزگاریكردنیان لە میرنشینەكە، یەكێك لەوانەش بریتی بووە لە دروستكردنی قەڵای دوین، كە دەكەوێتە سەر‌ شاخی دوین، لە زنجیرە شاخەكانی پیرمام، بەدووریی 40 كیلۆمەتر لە باكووری شاری هەولێر، لە سەردەمی عوسمانییەكاندا شوێنێكی ستراتیجی بووە، چونكە رێگەی‌ سەرەكیی نێوان هەولێر و رواندز و ئازەربایجان بووە، بەمەش تایبەتمەندی و بایەخی زۆری پێ دراوە".

 هەروەك لە ماڵپەڕی پارێزگای هەولێر ئاماژەی بۆ كراوە، مێژووی ئەم قەڵایە دەگەڕێتەوە بۆ سەدەی شازدەیەمی زایینی، بەتایبەتی لە سەردەمی عەلی بەگ سلێمان بەگدا، چونكە لەوكاتەی دوین پایتەختی میرنشینی سۆران بووە، بەڵام بەهۆی هێرشی پەیتا پەیتای میرنشینی بابان، ئیتر میرنشینی سۆران پایتەختەكەی گواستووەتەوە بۆ ناوچەی هەریر، قەڵای دوینیش كەوتە دەست بابانییەكان تا سەدەی هەژدەیەمی زایینی".

ئەم قەڵایە شێوەیەكی لاكێشەیی هەیە، چەندین حەوشە و ژوور و بورجی تێدایە، دیوارەكانی دووچاری لەناوچوون بوونەتەوە، سەرەڕای بوونی مزگەوت و شوێنی بەستنەوەی ئاژەڵ و ژووری كۆگا و هەسێل (حەوزی ئاو)ی دەستكرد، كە بەهۆی ئەسپ و هێستر ئاویان لە كانیاوێكی نزیك قەڵاكەوە دەهێنا و لە حەوزەكەدا عەمبار دەكرا، ئەو دیوارەی لە لای رۆژهەڵاتەوە ماوە 12.95 مەتر درێژە و بەشی باكووری 25 مەتر و بەشی باشووری 30 مەتر و پانییەكەی 70سانتیمەترە".

 لەلای رۆژئاواوە تەنیا 50 مەتر ماوە، ئەویش هەر بناغەكەیەتی. بورجە دەرەكییەكانی بەشێوەیەكی لوولەیی دروست كراون، بە تیرەی دوو مەتر، كە بەرگریكاران بەئاسانی دەتوانن جووڵەی تێدا بكەن، هەر بورجێكیش چواردە كونی هەیە و مەتەرێزیان تێدایە بۆ بینین و بەرگری لەو كونانەوە. پاشماوەی چەند كونێكی بچووك ماوە، كە تیرەكەیان 15سانتیمەترە و قووڵییەكەیان 10سانتیمەترە‌، كە وەك ئاگردان بەكار هاتوون بۆ رووناكی لە شەو و خۆ گەرمكردنەوە لە كاتی زستاندا، واتە زۆربەی تایبەتمەندییەكان لەخۆ دەگرێت.