ڕێوڕەسمی ساڵانەی دەف لێدانی هەورامان، کە یەکێکە لە گرنگترین بۆنە مۆسیقی و عیرفانییەکانی کوردستان، ڕۆژی سێشەممە ١٣ی ئەم مانگە لە گوندی گەشتیاری و پلیکانەیی پاڵەنگان و بە ئامادەبوونی زۆری هونەرمەندان و ئارەزوومەندان بەڕێوە چوو.

 لەم مەراسیمەدا کە لە لیستی میرات و کەلەپووریی جیهانیشدا تۆمار کراوە، هەزاران لێدەری دەف لە سەرانسەری وڵاتەوە کۆ بوونەوە و بە لێدانی دەف، بە هاوئاهەنگی و یەکگرتوویی، کەشێکی پڕ لە ڕۆحانیەت و سۆز و هاوسۆزییان لە دڵی سروشتی پاک و خاوێنی زاگرۆسدا دروست کرد.

 ئەم بۆنەیە کە بە قەرەباڵغترین کۆبوونەوەی دەفژەنەکان لە کولتووری کوردیدا ناسراوە، تەنیا نمایشێکی مۆسیقایی نییە، بەڵکوو ڕێوڕەسمێکی ڕەگ داکوتاوە کە ڕەنگدانەوەی بیروباوەڕی ئایینی و عیرفانیی خەڵکی ناوچەکەیە. شیعر و سروودەکانی عیرفانی، بە یاوەریی دەنگی دەف، لایەنێکی ڕۆحیی بەم ڕێوڕەسمە دەبەخشن.

 دیمەنی سەدان دەفژەن کە شان بە شانی یەکتر لەسەر پلیکانە بەردینییەکانی پاڵنگان دەف دەژەنن، هێمای یەکگرتوویی کولتووری و پەیوەندیی ڕۆحیی خەڵکی ئەم ناوچەیەیە. وێنەیەک کە ساڵانە هەزاران گەشتیار و ئەو کەسانەی ئارەزووی ڕۆشنبیری و مۆسیقایان هەیە، بۆ لای خۆی ڕادەکێشێت.