لە ئەنجامی وەرزێكی نوێی كنە و پشكنینی تیمی شوێنەوارناسانی ئۆتۆنۆموسی بەرشەلۆنەی ئیسپانی، بە هاوكاریی تیمەكانی بەڕێوەبەرایەتیی شوێنەوار و كەلەپووری سۆران و زانكۆی سەڵاحەدین، توانییان لە گردی بانەهێلك، كە كەوتووەتە گەڕەكێكی سەنتەری شاری سۆران، ئەنجامی نوێ‌ بدۆزنەوە.

 ڕەجەب زبێر حارس، قایمقامی قەزای ناوەندی سۆران، بە (باسكورد)ی ڕاگەیاند: "گردی شوێنەواری بانەهێلك دەكەوێتە سەنتەری قەزای ناوەندی ئیدارەی سۆران، لەلایەن زانكۆی ئۆتۆنۆموسی بەرشەلۆنەی لە ئیسپانیا و زانكۆی سەڵاحەدین و بەڕێوەبەرایەتیی شوێنەوار و كەلەپووری سۆران كاری كنە و پشكنینی تیادا ئەنجام دەرێت، ئێمەش لەنزیكەوە چاودێریی دەكەین و ئەوەی پەیوەست بە ئێمە بێت هاوكار دەبین."

 گوتیشی: "ئەم پڕۆژەیە بەشێك لە تەلارسازی و گڵێنەسازی شارستانییەتێكی حەوت هەزار ساڵە ئاشكرا دەكات، پێكهاتەی سەرسوڕهێنەر كە ڕۆشنایی دەخاتە سەر بەشێك لە شێوازی ژیان و ڕێكخستن و بیركردنەوەی ئەو كەسانەی كە لەم ناوچەیەدا دەژین لە هەزارەی پێنجەمی پێش زایین، لە سەرسوڕهێنەرترین دۆزینەوەكانی ئەم وەرزەی هەڵكۆڵینەكان، پاشماوەی ورچی قاوەیی و ئاژەڵی دیكەیە، ئاماژە بە پەیوەندیی كۆنی نێوان مرۆڤ و ژینگەی شاخاوی لەو سەردەمدا دەكات.“

 لای خۆیەوە د.عەبدوەهاب سلێمان، بەڕێوەبەری شوێنەوار و كەلەپووری سۆران، بە (باسكورد)ی ڕاگەیاند: "بانەهێلك دەكەوێتە ناو گەڕەكێكی سەنتەری قەزای ناوەندی سۆران، شوێنەوارێكی گرنگە و مێژووەكەی دەگەڕێتەوە بۆ نزیكەی 7000 ساڵ لەمەوبەر، ئەو شوێنە لە ڕووی تەلارسازی پێشكەوتوو بووە، بە بەراورد بە شوێنەوارەكانی دیكەی ئەوسەردەم زۆر جیاوازە، هەم لە ڕووی ڕووبەر و هەم لە ڕووی پێكهاتە و شێواز، بۆ نموونە ئەوانی دیكە گشتیان بازنەیین، بەڵام ئێمە بۆ یەكەمجار شوێنەواری هاوشێوەی لاكێشە و بینایەی چوارگۆشە دەبینین لە شوێنەواری بانەهێلك، لایەكی دیكەوە لە ئەنجامی كنە و پشكنین لە ساڵانی ڕابردوو تا ئێستا ئەنجامی باش دەست كەوتووە، بەڵام ئەمساڵ ئەنجامی جیاوازمان هەیە".

 ئاماژەی بەوەش دا: "لەمساڵدا دۆزینەوەی پاشماوەی بەشێك لە ئاژەڵی ورچە كە ئەم ئاژەڵە لە زنجیرە چیاكانی زاگرۆس و كۆێستانەكان هەیە، دوای پشكنینە سەرەتاییەكان بۆ ئەوە نەبووە ئەم ورچە ڕاو بكرێت و سوود لە گۆشتەكەی وەربگیرێت، بەڵكوو زۆر دڕەندە بووە و ڕاوكردنی بۆ سەلماندنی هێز و بازووی كۆمەڵەكە بووە لەو سەردەمدا، دوای ئەوەی كە ڕاو دەكرا پێستەكەی لەبەر دەكرا، بەتایبەت ئەو كەسەی كە خاوەن بڕیار و دەستەڵاتی هۆزەكە بوو، لەلایەكی دیكەوە ئێسك و پرووسكی ئاژەڵێكی دیكەمان دۆزیوەتەوە ئەویش گای كێوییە، كە هێشتا لەو سەردەمدا ماڵی نەكرابووە، مرۆڤی كۆن سەرەڕای ئەوەی كشتوكاڵی كردووە، هەوڵیشی داوە گا ڕاو بكات و دواتر وردە وردە ماڵیی بكات بۆ ناو ژیانی ڕۆژانەی خۆی، هەروەها كاتێك ئەو جۆرە گایەیان ڕاوكردووە، شاخەكانیان واتە (قۆچەكانیان) بەكار هێناوە، چونكە لە هونەری ئەوانەوە پێیانوابووە ئەوەی شاخەكانی گایەكەی لەسەرە خواوەندەكەیە، واتە گا هێمایەكی خواوەندیی بووە بەلایانەوە، كە هێمای هێز و بەرەكەت و زاوزێ‌ و دەستەڵات بووە.“

 شوێنەواری گردی بانەهێلك دەكەوێتە گەڕەكی برایەتی لە سەنتەری قەزای ناوەندی سۆران، بۆ یەكەمینجار لە ناوەڕاستەكانی سەدەی ڕابردوو لە لایەن تیمی زانكۆی شیكاگۆ، بە سەرۆكایەتیی (برایدوود و بروسهاو) كنە و هەڵكوڵینی بۆ كراوە، ئەو كات سەلمێندراوە ئەو شوێنەوارە مێژووەكەی بۆ نزیكەی 7000 ساڵ لەمەوبەر دەگەڕێتەوە، بگرە سەردەمێكی كۆنتریش، هەروەها بە گوتەی شوێنەوارناسان، ئەو پارچە چینانەی لە گردی بانەهێلك دۆزراونەتەوە، دەگەڕێنەوە بۆ بەردینی كانزایی شارستانیەتیی حەلەف.